Kan Mareano bruke USV i Nordsjøen neste år?

– Bruk av USV-er er éin metode å redusere klima- og miljøavtrykk når vi kartlegg havbotn. Derfor ønsker Mareano å få ei oversikt over kva som er mogleg i marknaden, og kva for klima- og miljøomsyn som kan vere relevante i ein mogleg anbodskonkurranse, seier Helge Welde frå Kartverket.

Ønsker innspel frå industrien

Mareano-programmet har ein intensjon om å publisere ein anbodskonkurranse for 2025, kor vi vil kartlegge i Nordsjøen med ubemanna overflatefartøy (USV). Før ein konkurranse blir publisert undersøker Mareano om USV kan oppfylle den tekniske kravspesifikasjonen for multistråleekkolodd og sub-bottom profiler-data (SBP) – mogleg med nokre tilpassingar av den eksisterande spesifikasjonen. 

– Vi inviterer industrien til å foreslå optimale løysingar for å kartlegge utvalde område. Vi ønsker også innspel på noverande teknisk spesifikasjon, for å tilpasse konkurransegrunnlaget som Mareano vil bruke i den USV-baserte anbodskonkurransen, seier Welde.

Send inn løysingsforslag

Alle selskap som ønsker å komme med løysingsforslag og tilbakemeldingar kan fylle ut skjema i Doffin eller TED innan 9. desember:

• Markedsdialog - USV i Mareano 2025 | Doffin, Database for offentlige anskaffelser
• Notice of intent – USV in MAREANO 2025 | TED

Meir detaljar om områda som Mareano ønsker å kartlegge med USV finn du på Doffin og TED. Alle bidrag vil bli behandla konfidensielt.

Nye miljøkrav til offentlege anskaffingar

Kartlegging av havbotn må gjerast med lågare klima- og miljøavtrykk. Eit av verktøya som blir brukt for å redusere påverknaden er offentlege anskaffingar. I januar 2024 blei det innført endring i forskrift om offentlege anskaffingar (anskaffelsesforskriften). Klima og miljø blir no vekta høgare i offentlege anskaffingar.

Anbodsprosessen med USV som kartleggingsplattform vil hjelpe Mareano med å utvikle spesifikasjon og tildelingskriteria for klima- og miljøomsyn brukt i offentlege anskaffingar.